Priere très dévote à la bienheureuse Vierge Marie mère de Dieu - 16 eme siecle

Oraison très dévote à la bienheureuse Vierge Marie mère de Dieu :

Obsecro te : Dame Saincte Marie mère de Dieu très plaine de pitié, fille du souverain Roy, mère très glorieuse, mère des orphelins, conseilleresse des desconseillés, salut des esperans en toy, voye des errans ; Vierge devant ton enfantement, vierge en l’enfantement et vierge après l’enfantement ; Fontaine de miséricorde, fontaine de salut et de grâce, fontaine de pitié et de liesse, fontaine de consolation et de pardon ; Je te prie par icelle grande liesse, en laquelle ton esperit se esleva en celle heure que sainct Gabriel l’archange te annunca la conception du benoist fils de Dieu ; Et par icelle inestimable grâce, pitié, miséricorde, amour et humilité ; par lesquelles vertus ton fils descendis prendre chair humaine en ton vénérable ventre : et es quelles il te regarda quant il te commanda a sainct Jehan apostre et evangeliste ; et quant il te exhaussa sur toute la compagnie des anges ;

Et par icelle saincte inestimable humilité en laquelle tu respondit à l’ange Gabriel : je suis chambérière de Notre Seigneur : face de moy selon ta parole.
Et par icelles très sainctes quinze joies que tu eus de ton fils Notre Seigneur Jesus Crist ;
Et par idcelle saincte grant pitié et compassion ; et par la douleur de ton cuer que tu eux quant tu vis ton chier filz Notre Seigneur Jesus Crist devant la croix tout nu, en icelle heure pendant crucifié, navré et morant de soif, criant Hely et mourant le vis ;
Et par les cinq plaies de son costé ; et par la contraction de ses entrailles ; et par la très grant douleur que tu eux quant tu le veis navré ; et par les fontaines de son sang ; et par la douleur de ton cuer ; et par la fontaine de tes larmes ;
Je te prie que tu viengnes avecques tous les saincts et eslus de Dieu, et te haste à mon aide et en mon conseil et en toutes mes prières et requestes ; et en toute bénédiction et sanctification, de toute salvation de paix et de toute prospérité, de joye, de liesse et de toute bonté.

Et me donne abundance de tous biens et spirituels et corporels ; et la grâce de sainct Esperit qui me ordonne bien en toutes choses ;
Et vueille m’âme garder et mon coprs gouverner, mes pensées adrecier, mes meurs ordonner, mes faitz esprouver, mes veulz et mes désirs parfaire ; et me vueilliés donner sainctes pensées, les maulx passez pardonner, les présens amender et ceulx advenir atremper ;
Vie honneste et honorable me vueille donner ; et victoire contre toutes les adversitéz de ce monde. Et me vueilles donner paix espirituelle et corporelle, bonne espérance, charité, foy, chasteté, humilité et pacience.
Et vueillés mes cinq sens gouverner et deffendre. Et me faire acomplir les sept euvres de miséricorde, et fermement tenir les dix commandements de la foy, et croire les douze articles de la foy. Et me vueilles delivrer de deffendre des sept pechies mortels et maintenir en bonnezs euvrres jusques en la fin.

Et en mes derains jours me vueillez monstrer ta face ; et me vueillez annuncer l’eure et le jour de ma mort ; et donner vie pardurable.
Oy et exaulce ma prière, douce mère de Dieu et de miséricorde.